شرح كيفية توصيل الصبات وازاي تختار جي ام مناسب لصبك

طريقة التوصيل بتفرق في القوة فرق شااااسع !! خصوصا في الصبات الدبل كويل !! انا من كام يوم قلت اعكس طريقة التوصيل اللى انا موصل بيها الصب عندي عشان اجرب لقيت ان قوة الصوت قلت لاقل من الربع تقريبا !!

فلازم كل واحد يبقى فاهم كويس اوي هو بيوصل ازاي وهيركب الصب بتاعه ازاي ويختارله جي ام مناسب ليه خصوصا ان كل الصنايعية اللى في المحلات مش فاهمين اي حاجة في اي حتة !!!!!!!!!!!!

بس قبل ماندخل في الموضوع لازم نعرف ان الصبات انواع وكذلك الجي امات انواع بس حابب اوضح حاجتين قبل ماندخل في المفيد

RMS: بالبلدي او بإختصار دي القوة الفعلية اللى بيطلعها الصب او الجي ام 

Ohm : الاوم هي وحدة قياس المقاومة يعني لما نقول ان الجي ام خرجه 300 watt rms @ 2 ohm يبقى الجي ام ده بيخرج قوة مقدارها 300 وات فعلي لما تكون المقاومة 2 اوم

دلوقتي نبدأ الاول بانواع الصبات

الصبات نوعين :

1- Single Voice Coil : وده بيبقى صب عبارة عن كويل واحد وبيكون فيه مخرجين 2 فقط على شكل ( + / - )

2- Double Voice Coils : وده بيبقى صب عبارة عن 2 كويل وبيكون فيه 4 مخارج على شكل ( - / + / - / + )

كل كويل من كويلات الصب بيكون ليه مقاومة مختلفة فيه صبات بتبقى الكويل مقاومته 2 اوم وفيه صبات 4 اوم وفيه صبات 8 اوم

نيجي لشرح الطرق المختلفة اللى ممكن توصل بيها الصب

1- الصبات السنجل كويل :

زي ماتفقنا ان الصبات السنجل كويل بيكون فيها مخرجين والكويل بيكون مقاومته ياما 2 اوم او 4 اوم او 8 اوم

يبقى احنا عندنا تلت احتمالات

1 - الصب يكون سنجل كويل 2 اوم 

في الحالة دي انت هتاخد من الصب سالب وموجب وكدة هيروح للجي ام مقاومة 2 اوم زي في الصورة كدة بالظبط

2 - الصب يكون سنجل كويل 4 اوم

زي ماهو واضح كدة ان الصبات السنجل كويل مافيش فيها تعقيدات ولا ابتكارات ومافيش عندك اي طرق للتوصيل لان هو مخرجين بتاخدهم وتديهم للجي ام

فزي مابيكون مقاومة الصب بتروح للجي ام نفس المقاومة !! يعني لو الصب مقاومته عفريت اوم يبقى سعتها هيروح للجي ام مقاومة عفريت اوم

نيجي للاهم وهو محور الموضوع وهو طرق توصيل الصبات الدبل كويل

الصبات الدبل كويل فيه منها 4 مخارج ( + / - / + / - )

وبرضوا الصبات الدبل كويل ليها انواع

1 - دبل كويل 2 اوم

2 - دبل كويل 4 اوم

3 - دبل كويل 8 اوم

معظم الصبات اللى في مصر دبل كويل 4 اوم ودي اللى هبدأ بيها

بيبقى عندنا طريقتين في التوصيل :

الاولى وهي اننا نوصله عن طريق اننا نقفل المخرجين اللى في النص مع بعض وناخد طرف موجب وطرف سالب نوصله للجي ام وفي الحالة دي هيبقى الصب بيخرج مقاومة 8 اوم

زي مالصورة موضحة بنوصل الاتنين اللى في النص مع بعض وبنخرج طرفين من الصب للجي ام وكدة بيروح للجي ام مقاومة قدرها 8 اوم

طيب نيجي للطريقة التانية لنفس الصب اللى هو دبل كويل 4 اوم

ودي ببساطة بتوصل السالب مع السالب والموجب مع الموجب وبتخرج فرد واحدة من كل طرف فيهم وفي الحالة دي انت شغلت الصب 2 اوم

زي مالصورة مابتتكلم !! سالب مع سالب وطلع فردة

موجب مع موجب وطلع فردة تانية كدة الصب اشتغل 2 اوم

طيب نيجي للنوع التاني من الصبات الدبل كويل وهي ان الصب يكون دبل كويل بس 2 اوم 

نفس الكلام هما طريقتين للتوصيل مافيش غيرهم !!

ياما بتقفل اللى في النص وتاخد طرف سالب وطرف موجب وفي الحالة دي انت شغلت الصب 4 اوم

الطريقة التانية اننا نوصل سالب مع سالب وطلع فردة // موجب مع موجب وطلع فردة

وكدة انت وصلت الصب 1 اوم

كدة احنا عرفنا طرق التوصيل اللى ممكن نوصلها للصب بتاعنا سواء كان دبل كويل او سنجل كويل

سواء كان مقاومة كل كويل 2 اوم او 4 اوم

بس ياعم الحج انت واجع دماغنا من الصبح !! 2 اوم / 4 اوم عفريت اوم !! ؟ هنستفيد ايه من كل ده ؟؟ وايه اللى يخلينا نوصل 2 اوم ومانوصلش 8 اوم ؟؟

براحة بس هقولك !! بس قبل ماندخل في الموضوع ده خلينا الاول نتعرف على انواع الجي امات

1- Mono Block 1 Channel

2- 2 Channel

3- 4 Channel

4- 5 Channel

مش محتاج اني اوضح لان كل جي ام بيشرح نفسه !! 1 شانيل يعني قناة واحدة ,, 2 شانيل يعني قناتين وهكذا

بس اللى عايز اوضحه ان الجي امات ال 2 شانيل او ال 4 شانيل انت تقدر توصله عن طريق حاجة اسمها Bridge ومعظم الجي امات Bridgeable 

بإختصار الجي ام ال 2 شانيل بيكون فيه اربع فتحات ( + / - / + / - ) كل سالب وموجب = قناة وكدة ده 2 شانيل 

لو وصلت الصب على قناة واحدة وسبت التانية يبقى كدة انت وصلته على Channel واحدة وكل الجي امات بيكون خرج القناة لوحدها 2 اوم

اما لو وصلت اخر طرف موجب واخر طرف سالب يبقى انت جمعت قوة الجي ام كلها ووصلته بريدج

طيب ايه علاقة الجي ام بالمقاومة ؟؟؟ 

كل جي ام بيبقى ليه خرج معين بيتقاس بال RMS الخرج ده بيختلف على حسب المقاومة اللى جاية للجي ام من الصب

120 Watts x 2 @ 4-Ohm 

200 Watts x 2 @ 2-Ohm

الجملة دي معناها ايه ؟؟؟

معناها ان الجي ام ده بيخرج قوة مقدارها 200 watt لكل قناة (طبعا مضروبة في 2 لانه 2 شانيل) وده لما تكون المقاومة اللى رايحة للجي ام 2 اوم !! 

بس لو كانت المقاومة اللى رايحة للجي ام 4 اوم يبقى القوة اللى هيخرجها الجي ام هي 120 وات فقط !!! طب لو كانت المقاومة اللى رايحة للجي ام 8 اوم ؟؟ سعتها هتاخد 60 وات فقط

400 Watts x 1 @ 4-Ohm Bridged

دي معناها انك لما هتوصل الجي ام ال 2 channel بريدج !! يعني هتاخد قوة مقدارها 400 وات لو كانت المقاومة 4 اوم 

فيه قواعد ثابتة خلينا نتفق عليها

اي جي ام 2 شانيل / 4 شانيل لما بتوصله بريدج الخرج بيكون 4 اوم

اي جي ام 2 شانيل / 4 شانيل تشغل الصب على قناة واحدة بس بيكون الخرج 2 اوم

عادي انك توصل مقاومة اعلى من مقاومة الجي ام !! يعني لو الجي ام الخرج بتاعك في البريدج بيخرج عند 4 اوم مافيش مشكلة انك توصل صب عليه 8 اوم بس سعتها هتاخد نص القوة فقط !!! شفت طريقة التوصيل بتفرق ازاي ؟؟

خطر خطر خطر !! واسمحولي لو كاتبها بالاحمر - انا عارف انه ممنوع - بس لازم تكون واضحة 

ماينفعش باي حال من الاحوال انك توصل للجي ام مقاومة اقل من المقاومة اللى هو بيشتغل عليها !! 

400 Watts x 1 @ 4-Ohm Bridged

يعني الجي ام ده بيخرج قوة 400 وات في البريدج لو كانت المقاومة 4 اوم !! ماينفعش انك توصل عليه صب 2 اوم او 1 اوم بريدج سعتها الجي ام هيتحرق !!!! بس القاعدة دي ليها إستثناءات

في حالة لو الجي ام يستحمل ال Over Load هتلاقي مكتوب في مواصفاته

ohm 2 bridged stable

وده معناها انك مافيش مشكلة انك توصل صب 2 اوم في البريدج على الجي ام ده !!

ومن الاخر مافيش ولا جي ام في مصر 2 اوم Stable الا بعض موديلات السيمفوني !!

اما كل موديلات البايونير / الكينود / السوني !! كلها تضرب لو وصلت 2 اوم على البريدج

وطبعا زي مافيه 2 اوم Stable فيه برضوا حاجة اسمها 1 اوم Stable 

وده برضوا بيسمحلك انك توصل 1 اوم على البريدج او في بعض الجي امات ال Mono ودي طبعا للحجات العالية اوي اللى مش موجودة اساسا في مصر فممكن نعتبر ان الجملة دي مش موجودة في الموضوع

كدة تقريبا عرفنا انواع الصبات وانواع الجي امات وبسهولة من كتالوج اي صب / جي ام او حتى مجرد ماتكتب موديله في جوجل هيطلعلك ال Specifications بتاعته وهتقدر تعرف الصب ده سنجل ولا دبل !! ومقاومته شكلها عاملة ازاي

وفي نفس الوقت هتقدر تعرف الجي ام بتاعك قوته قد ايه عند كل مقاومة وهل هو 2 اوم Stable ولا لاء !! وبناء على كدة هتقدر تحدد انت هتوصل الصب بتاعك ازاي عشان تستفيد بقوته كاملة !!

يعني على سبيل المثال لو انا عندي صب دبل كويل 4 اوم علطول يجي في دماغي اني قدامي طريقتين للتوصيل واحدة هتديني 8 اوم والتانية هتديني 2 اوم

بس قبل مافكر اوصل لازم يكون في دماغي الجي ام اللى هشتريه وموصفاته عاملة ازاي ؟؟

نفترض اني معايا جي ام سيمفوني 400 وات 2 شانيل 

الجي ام ده قوته الفعلية 150*2 @ 2 اوم

وطبعا انا هوصل بريدج عشان اخد القوة كلها يبقى في الحالة دي اشوف الجي ام ده قوته قد ايه في البريدج وعند كام اوم هلاقي انه 300 وات بريدج عند 4 اوم 

وهتلاقي مكتوب كمان انه 2 اوم Stable !!

لو انا وصلت الصب عن طريق اني قفلت اللى في النص وخدت طرف سالب وطرف موجب اديته لبريدج الجي ام ( وده اللى 95% من الصنايعية بيعملوه لانهم مش فاهمين اي حاجة في اي حته )

كدة انا وصلت الصب 8 اوم !! بس الجي ام خرجه في البريدج 300 عند 4 اوم ؟؟؟ يحصل حاجة لو وصلت 8 اوم؟؟

لا مايحصلش لاننا اتفقنا انه عادي اني اوصل مقاومة اعلى بس سعتها مش هاخد 300 !! لا سعتها هتبقى قوته 150 فقط !!!!!!!!

اما لو وصلت سالب مع سالب وطلعت فردة سالب / موجب مع موجب وطلعت فردة موجب

كدة رايح للجي ام 2 اوم !! بس انت قلت ان كل الجي امات ال 2 شانيل في البريدج 4 اوم !! ؟ كدة هيتحرق ؟؟

لا يا ريس ماهو مكتوب انه 2 اوم Stable

وكدة مبروك عليك ال 300 كامليين يا معلم !!

تقريبا هتاخد اكتر من ضعفين قوة الصوت لو وصلت بالطريقة التانية !!!

انا متاكد ان معظمنا معاه جي امات سيمفوني !! ومعظمها 2 اوم Stable مع اني شاكك في الموضوع ده لان الجي امات العالية بس هي اللى بتبقى 2 اوم Stable !! ؟؟ بس اهو مكتوب على الجي ام كدة والله واعلم

وهتلاقي ان معظم الناس بتوصل 8 اوم وواخدة نص طاقة الجي ام !! في حين انه ممكن يعكس طريقة التوصيل وياخد القوة كلها وهتديله تقريبا ضعفين قوة الصوت

وده اللى بيفسر ان معظم الناس بتقول ان البوازيك اقوى من الصبات !! لا يا ريس !! ده عشان انت مش عارف توصل صبك صح !!

البازوكا بتبقى جاية جاهزة بمقاومة 4 اوم بتحطها على البريدج بتاخد القوة كلها وشكرا

اما الصبات فعايزلها فن !! وغير موضوع المقاومات فيه حاجة مهمة برضوا وهي نوعية البوكس ومقاساته وده بيفرق في كتيير اوي 

خلينا نلخص اللى فات ده كلو بإننا نقول ايه احسن جي ام لكل نوع من انواع الصبات اللى اتكلمنا عليهم !!

بس قبل مانقول بفكركم ان الجي امات ال 2 شانيل خرجها في البريدج بيبقى 4 اوم

الجي امات ال mono بيبقى خرجها 2 اوم

1- صب سنجل كويل 2 اوم : ده مقاومته 2 اوم يبقى احسن جي ام ليه ياما جي ام Mono ياما جي ام 2 شانيل بس يكون 2 اوم Stable 

2- صب سنجل كويل 4 اوم : ده مقاومته 4 اوم يبقى احسن جي ام ليه هو 2 شانيل وهتوصل بريدج

3- صب دبل كويل 2 اوم : ده مقاومته ياما 1 اوم ياما 4 اوم !! يبقى لو هنوصل 4 اوم نجيب جي ام 2 شانيل ونوصل بريدج ,, لو هنوصل 1 اوم يبقى نجيب جي ام mono بس يكون 1 اوم Stable

4- صب دبل كويل 4 اوم : ده مقاومته ياما 2 اوم ياما 8 اوم على حسب طريقة التوصيل ,, يبقى احسن جي ام mono وهتوصل 2 اوم ,, ياما جي ام 2 شانيل ويكون 2 اوم Stable ,,,, مالقتش لا ده ولا ده هضطر انك توصل 8 اوم وتاخد نص قوة الجي ام فحاول سعتها تجيب جي ام اقوى من الصب بكتير عشان لما تاخد نص القوة تسمع برضوا صوت كويس